ᖁᒪᖅ ᒪᖏᐅᖅ ᐃᔦᑦᑐᖅ
Oct 12

ᐃᕗᔨᕕᒃ

ᓄᓇᖃᕐᑐᖅ ᐃᕗᔨᕕᒻᒥ, ᓄᓇᕕᒻᒥ, ᖁᒪᖅ ᒪᖏᐅᖅ ᐃᔦᑦᑐᖅ ᑖᓐᓇᐅᕗᖅ ᐊᒥᓱᐃᓂᒃ ᐱᒍᓐᓇᑕᓕᒃ ᐊᑦᔨᒌᓐᖏᑐᓂᒃ ᑖᓐᓇᓗ ᐱᓇᓱᐊᓲᖅ ᐊᓪᓚᖑᐊᕐᓂᒥᒃ, ᒥᖑᐊᓐᖑᐊᓂᕐᒥᒃ ᐊᒻᒪᓗ ᐊᑦᔨᖑᐊᓕᐅᕐᓂᒥᒃ.  ᐃᓚᖃᕐᓱᓂ ᑖᒃᑯᓂᖓ ᒥᐊᔨ ᐸᓂᖓᔭᒃ ᐊᓚᑯᒥᒃ, ᐹᓴ ᒪᖏᐅᕐᒥᒃ ᐊᒻᒪᓗ ᓕᓐ ᐹᓯᑎᐊᒥᒃ, ᑖᓐᓇ ᐃᓚᐅᕕᓕᒃ ᑲᑐᑦᔨᔪᓂ ᑕᑯᒥᓇᕐᑐᓕᐅᕐᑐᓄᑦ ᑖᒃᑯᐊᓕ ᐱᒋᐊᕐᑎᓯᓯᒪᔪᑦ ᐊᒥᐊᕆᓂᕐᒧᑦ ᑲᑎᒪᓂᐊᕈᓯᕐᒥᒃ ᐃᕗᔨᕕᒻᒥ.  ᐊᒻᒪᓗ ᓱᓕ ᐃᓚᒋᒻᒥᔭᖓᑦ ᖁᒪᐅᑉ ᐊᓪᓚᖑᐊᕐᓯᒪᔭᖏᑦᑕ ᐊᑐᕐᑕᐅᕙᒻᒥᔪᖅ ᑕᕐᓴᕆᓕᕐᑕᖓᓂᒃ ᓇᓗᓀᒃᑯᑕᕆᑦᓱᒍ ᑖᒃᑯᓄᖓ ᑲᑎᒪᔨᒃᑯᓄᑦ.

ᐃᓚᒋᒻᒥᔭᖓᓗ ᐱᓇᓱᐊᓲᖏᑦᑕ ᑕᑯᒥᓇᕐᑐᓕᐅᕆᐊᒥᒃ, ᖁᒪᖅ ᓱᓕᐅᒋᕗᖅ ᐱᓇᓱᐊᕐᓯᒪᓂᖓ ᐱᓇᓱᐊᕐᑕᐅᓂᖓᓂ ᐃᓕᓴᕐᓂᐅᑉ, ᐱᓇᓱᐊᖃᑦᑕᓯᒪᓂᖓ ᐃᓕᓭᔨᐅᑦᓱᓂ ᐊᒻᒪᓗ ᑲᒪᔨᒻᒪᕆᐅᑦᓱᓂ ᐃᓕᓴᕐᕕᒥ ᐊᓂᕐᕋᒥᓂ ᓄᓇᒥᓂ.  ᑖᑦᓱᒪ ᑐᓂᕐᕈᓯᐊᖓ ᐃᓕᓭᒍᓐᓇᓂᕐᒥᒃ ᐊᒻᒪᓗ ᖁᕕᐊᒋᔭᖓ ᐅᓂᒃᑳᖑᐊᕆᐊᒥᒃ ᑎᑭᐅᑎᒍᑎᒋᓯᒪᒋᕙᐅᒃ ᒪᓂᔨᒋᐊᒥᒃ ᐅᓂᒃᑳᓂᒃ ᐊᑐᐊᒐᓕᐅᕐᓂᒥᒃ-ᓴᓇᒋᐊᒥᒃ ᑲᑎᒪᓂᐊᕈᓯᕐᓂᒃ ᓄᓇᕕᓕᒫᖅ ᓈᑦᓱᒍ, ᓄᓇᓕᓐᓂ ᑖᒃᑯᓇᓂ ᐃᓄᒃᔪᐊᒥ, ᐊᑯᓕᕕᒻᒥ, ᐃᕗᔨᕕᒻᒥ, ᓴᒡᓗᓂ, ᐊᒻᒪᓗ ᑲᖏᕐᓱᔪᐊᒥ.  ᑖᑦᓱᒪᐅᑉ ᐱᓯᒪᔭᖏᑦ ᑫᒥᑕᐅᒍᑎᒋᑦᓱᒋᑦ ᐊᒻᒪᓗ ᐱᓐᓇᕆᔭᖏᑦ ᐱᓇᓱᐊᕆᐊᖏᑦ ᓴᓇᔭᐅᓂᖏᓐᓄᑦ ᑕᒪᒃᑯᐊ ᐊᑦᔨᖑᐊᕐᑕᖃᕐᓱᑎᒃ ᐊᑐᐊᒑᐲᑦ ᐃᓚᖃᕐᒥᓱᑎᒃ ᐃᓄᐃᑦ ᐱᐅᓯᖏᓐᓂᒃ ᐊᒻᒪᓗ ᐅᓂᒃᑳᖏᓐᓂᒃ ᐃᓄᐃᑦ ᐃᓅᖃᑎᒥᑕ ᐱᔭᐅᓯᒪᔪᑦ ᑭᖑᕚᕇᓂᑦ ᑭᖑᕚᓄᑦ, ᐊᒻᒪᓗ ᐃᓚᒌᑎᒍᑦ ᐅᓂᒃᑳᓂᒃ, ᐊᖑᓇᓱᒃᑐᖑᐊᓂᒃ ᐊᑦᔨᖑᐊᓕᐅᕐᓂᓂᒃ, ᐊᒻᒪᓗ ᑕᑯᒥᓇᒻᒪᕆᑦᑐᓂᒃ ᓄᓇᓂᒃ ᓄᓇᖓᓐᓂᒃ ᓄᓇᕕᐅᑉ.

ᖃᒻᒥᓱᒃ ᐅᑭᐅᓂ ᖄᖏᕐᑐᓂ, ᖁᒪᖅ ᐱᑎᑕᐅᓯᒪᔪᖅ ᑮᓇᐅᔭᖃᕐᑎᑕᐅᒍᑎᓂᒃ ᐱᔪᓂᒃ ᓄᓇᕕᒻᒥ ᑕᑯᒥᓇᕐᑐᓕᐅᕐᓂᒧᑦ ᐊᒻᒪᓗ ᐊᑐᐊᒐᓕᐅᕐᓂᒧᑦ ᐱᓇᓱᐊᕐᑕᐅᔪᓂᑦ ᐃᓕᑕᕆᔭᐅᒍᑎᒋᑕᖓᓂᐅᒃ ᐱᐅᔪᖅ ᐱᑦᓯᐊᒍᑦᓱᑎᒃ ᐱᓇᓱᐊᓕᓂᖏᑦ,  ᑖᓐᓇᓗ ᐃᓚᐅᕕᖃᕐᓯᒪᑦᓱᓂ ᑲᑐᑦᔨᔪᓂ ᐊᒥᓱᐃᒍᑦᓱᑎᒃ ᑕᑯᑦᓴᐅᑎᑕᐅᔪᓄᑦ ᒪᑯᓇᓂ ᑌᒪ Covergence North/South ᐃᑲᓂ Feheley Fine Arts Gallery ᑐᔮᓐᑐᒥ ᑕᑯᔭᒐᖃᕐᕕᐊᓂ, ᐊᒻᒪᓗ ᐃᓪᓕᕆᔭᕗᑦ: ᐃᓪᓕᕆᔭᕗᑦ ᐃᒫᒃ ᐊᓐᓂᓇᕐᑐᖁᑎᓂ ᑌᑲᓂ McClure Gallery ᒪᓐᑐᔨᐊᓚᒥ ᑕᑯᔭᒐᖃᕐᕕᖓᓂ.

ᐱᓪᓗᒍ ᐅᓇ ᓇᖏᖃᑎᒌᓐᓂᖅ ᐊᑕᐅᑦᓯᑯᑦ ᐊᖅᖁᓯᕐᑎᓗᒍ ᑕᑯᒥᓇᕐᑐᓕᐅᕐᓂᐅᑉ ᐱᓇᓱᐊᕐᑕᐅᓂᖓ, ᖁᒪᖅ ᐊᑐᕐᓂᐊᓱᓂ ᓴᓇᑦᔫᒍᑎᒥᓂᒃ ᐊᒻᒪᓗ ᐅᓂᒃᑳᓂᒃ ᐅᓂᒃᑳᕆᐊᒥᒃ ᐱᒍᓐᓇᑕᖃᕋᒥ ᐅᓂᒃᑳᕆᓂᐊᕐᓗᒍ ᐅᓇ ᑯᔫᓇᕓᔭᓯ ᖃᓂᒻᒪᓯᖅ ᓯᓚᕐᕈᐊᓕᒫᒥ ᓯᐊᒻᒪᓯᒪᔪᖅ (COVID-19) ᐊᒻᒪᓗ ᓱᕐᕃᓯᒪᓂᐊᓗᐊᓂᒃ ᓈᒻᒪᓯᐊᓐᖏᑐᒃᑯᑦ.

Get Back to the Project: ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ