Jul 16

ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ

Beadwork. Credit: Ulivia Uviluk

ᐱᓇᓱᐊᒐᑦᓴᐅᑉ ᓇᓗᓀᕐᑕᐅᒍᑎᖓ

ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ ᐱᓇᓱᐊᕐᑕᐅᓂᖓ ᒪᓂᔨᔪᖅ ᐅᓂᒃᑳᓗᒍ ᖃᐅᔨᔭᓂ ᑕᒪᑐᒥᖓ ᐊᑑᑎᔭᐅᔪᒧᑦ ᓄᕙᓐᓇᒧᑦ (COVID-19) ᒧᑦ ᖃᓂᒪᓐᓇᖅ ᐃᓄᐃᑦ ᐊᑯᕐᖓᓂ ᓄᓇᕕᒻᒥᐅᑦ ᓴᓇᓐᖑᐊᓂᕐᒥᒍᑦ ᐅᓂᒃᑳᓂᖅ, ᓄᐃᑎᕆᓂᒃᑯᑦ ᓴᓇᔭᒥᑎᒍᑦ ᐊᒻᒪᓗ ᐅᖃᐅᓯᕆᓗᒍ, ᓴᖅᕿᑎᕆᑦᓱᑎᒃ ᐊᒻᒪᓗ ᑕᑯᔭᑦᓴᖑᕐᑎᓚᕆᑦᓱᒋᑦ ᐱᒍᓐᓇᓂᖓᒍᑦ ᓴᓇᔭᒥᑕ.  ᑐᓐᖓᕕᒋᑦᓱᒍ ᓴᓇᑦᔫᓂᒃᑯᑦ, ᐅᓇ ᐱᓇᓱᐊᕐᓂᖅ ᐃᓱᒪᖃᕐᒪᑦ ᓯᕗᒧᐊᑦᑎᓯᒍᒪᑦᓱᓂ ᓇᒻᒥᓂᖓᓄᑦ ᐃᓅᑉ ᐊᒻᒪᓗ ᓄᓇᓕᑦᑎᒍᑦ ᖃᓄᐃᓐᖏᓯᐊᕐᓂᒥᒃ ᑕᒡᕙᓂ ᐊᑑᑎᔪᒥᒃ ᖃᓂᒪᓐᓇᒥ.

ᓄᓇᕕᒻᒥᐅᑦ ᓴᓇᓐᖑᐊᓲᑦ ᐃᓚᐅᕕᓖᑦ ᑕᒡᕙᓂ ᐱᓇᓱᐊᕐᑕᐅᔪᒥ ᓴᓇᓲᑦ ᐱᓇᓱᐊᕐᓱᒍ ᓴᓇᓐᖑᐊᓱᑎᒃ ᓄᐃᓚᕿᔪᓂᒃ ᐊᒥᓱᐃᓂᑦ ᐱᔪᓂᒃ ᖃᓂᒪᓐᓇᐅᑉ ᐱᔮᓄᑦ ᖃᐅᔨᔭᒥᓐᓂᒃ, ᑕᒐ ᓱᔪᕕᓃᑦ ᐊᒻᒪᓗ ᐃᒃᐱᓂᕐᑕᐅᔪᑦ ᐱᑐᑦᓯᒪᑦᓱᑎᒃ ᑕᒪᑐᒧᖓ ᐊᑑᑎᔭᐅᔪᒧᑦ, ᐊᒻᒪᓗ ᐋᖅᕿᓯᒪᐅᑎᑦᓴᓄᑦ ᐊᑐᕐᑕᐅᔪᓄᑦ ᒪᑭᑕᐅᑎᐅᑦᓱᑎᒃ ᑕᒪᓐᓇ ᐱᓕᕐᑎᓗᒍ.  ᓯᑕᒪᑦ ᓴᓇᓐᖑᐊᓲᑦ ᑕᒐᑕᒐᐅᑎᓪᓗᒍ ᓴᓇᕗᑦ ᓴᓈᑦᓴᐅᒐᔭᕐᑐᓂᒃ ᑐᓐᖓᕕᒋᑦᓱᒍ ᒪᓐᓇ ᑕᒐ ᓱᓀᑦ ᑕᒐᑕᒐᐅᑎᓪᓗᒍ COVID-19 ᖃᓂᒪ ᐃᓱᒪᓇᕐᒪᖔᑕ ᑖᒃᑯᓄᖓ.  ᑖᒃᑯᐊ ᓴᓇᓐᖑᐊᓲᑦ ᐅᑯᐊᒍᕗᑦ ᑕᒐ ᒥᐊᔨ ᐸᓂᖓᔭᒃ ᐊᓚᑯ, ᖁᒪᖅ ᒪᖏᐅᖅ ᐃᔦᑦᑐᖅ, ᐅᓇᓗ ᐹᓴ ᒪᖏᐅᖅ ᑖᒃᑯᐊ ᐃᕗᔨᕕᒻᒥᐅᑦ, ᐊᒻᒪᓗ ᐅᓇ ᐅᓕᕕᐊ ᓕᐊ ᑑᒪᓯ ᑖᓐᓇ ᑲᖏᕐᓱᒥᐅᖅ ᐊᒻᒪᓗ ᑕᒐᑕᒐ ᒪᓐᑐᔨᐊᓚᒥ ᓄᓇᓕᒃ.

ᒪᑯᐊ ᐱᑦᓭᑦ ᐊᑐᕐᓱᒋᑦ ᐱᓇᓱᒍᑎᒋᓗᒋᑦ ᓴᓇᔭᐅᔪᓄᑦ ᑕᒡᕙᓂ ᐊᑑᑎᔪᒥ ᐱᓇᓱᐊᕐᑕᐅᔪᒧᑦ ᓇᓪᓕᑳᕐᑕᐅᓯᒪᕗᑦ ᑖᒃᑯᓄᖓ ᓴᓇᓐᖑᐊᑎᓄᑦ ᐊᒻᒪᓗ ᐃᓚᖃᕐᒥᓱᑎᒃ ᐊᓪᓚᖑᐊᕐᓯᒪᔪᓂᒃ ᐊᓪᓚᕕᑦᓴᒥᒃ (ᕿᕐᓂᑕᒥ ᐊᒻᒪᓗ ᖃᑯᕐᑕᒥ ᐊᒻᒪᓘᓐᓃᑦ ᑕᐅᑦᑐᓕᓐᓄᑦ), ᒥᖑᐊᓐᖑᐊᓯᒪᔪᑦ, ᖃᕆᑕᐅᔭᒧᑦ ᐊᓪᓚᖑᐊᕐᓯᒪᔪᑦ ᐊᒻᒪᓗ ᓴᓇᔭᐅᔪᑦ, ᐊᒻᒪᓗ ᓴᐸᖓᓂᒃ ᐊᑐᕐᓱᑎᒃ.  ᑕᒪᓐᓇ ᐊᑦᔨᒌᓐᖏᑐᓂᒃ ᐊᑐᕐᓱᓂ ᓂᕆᐅᒍᑎᓕᒃ ᐃᓕᑕᕐᓯᒍᑎᒋᓗᒍ ᐃᒫᒃ ᑭᓐᖒᒪᓇᕐᓂᖓᓂᒃ ᐊᒻᒪᓗ ᑕᐅᑐᒍᓯᖏᓐᓂᒃ ᑕᒪᒃᑭᓱᒋᒃ ᐃᓄᒻᒪᕇᑦ ᐊᒻᒪᓗ ᐅᕕᒐᕐᑐᐃᑦ, ᐊᒻᒪᓗ ᓄᐃᑦᓯᒍᑎᐅᓗᓂ ᐅᖃᖃᑎᒌᓐᓂᒥᒃ ᑭᖑᕚᕇᑦ ᐊᑯᕐᖓᓂ.

ᐊᑦᔨᖑᐊᖏᑦ ᑕᒪᒃᑯᐊ ᓴᓇᓐᖑᐊᑏᑦ ᓴᓇᔭᖏᑦᑕ ᑲᒪᒋᔭᐅᓛᕐᑐᑦ ᐊᑦᔨᓕᐊᒍᓗᑎᒃ ᐊᒻᒪᓗ ᑕᑯᔭᑦᓴᖑᕐᓗᑎᒃ ᑕᒡᕙᓂ ᑕᑯᔭᑦᓴᓕᐅᕐᕕᒥ ᐊᑕᔪᒥᒃ ᑲᔪᓯᔭᐅᓗᓂ ᑐᓐᖓᕕᖃᕐᑎᓗᒍ.  ᑕᑯᑦᓴᐅᑎᑦᓯᓂᒃᑯᑦ ᓴᓇᓐᖑᐊᓯᒪᔪᓂᒃ ᐱᓇᓱᐊᕐᑕᕕᓂᕐᓂᒃ ᖃᕆᑕᐅᔭᒥ ᐅᓂᒃᑳᓯᐅᒐᑦᓴᓂ, ᑕᒪᓐᓇ ᐱᓇᓱᐊᕐᑕᐅᔪᖅ ᐃᓱᒪᒍᑕᐅᕗᖅ ᐅᖃᖃᑎᒌᓚᖀᒍᑎᑦᓴᐅᓗᓂ ᑌᒃᑯᓇᓐᖓᑦ ᐅᓂᒃᑳᓯᐅᒐᑦᓴᓂᒃ ᓄᐃᑕᑎᑦᓯᕕᒻᒥ ᑕᑯᒋᐊᖃᑦᑕᓂᐊᕐᑐᓄᑦ, ᓱᒐᓗᑦᑐᒥᒃ ᐊᔪᐃᓐᓇᓇᕐᑐᒦᓐᓇᑐᒃᑰᓂᕐᒥ ᐊᒻᒪᓗ ᐊᓂᒍᐃᒍᓐᓇᖃᑦᑕᓂᕐᒥ ᐱᔪᒥᒃ ᐱᑦᓱᒍ ᓄᐃᑎᑕᖓ ᖃᓂᒪᓐᓇᐅᑉ.  ᐅᑯᐊ ᐃᓄᓕᒫᑦ ᐃᓇᑕᐅᒋᕗᑦ ᐃᓚᐅᕕᖃᖁᑦᓱᒋᑦ ᑕᒪᑐᒧᖓ ᐱᓇᓱᐊᕐᑕᐅᔪᒧᑦ ᓄᐃᑦᓯᖃᑕᐅᖁᑦᓱᒋᑦᑕᐅᖅ ᓴᓇᖃᑦᑕᑕᕐᒥᓂᒃ ᓇᒻᒥᓂᖅ ᑕᒪᑐᒪᓂ ᖃᕆᑕᐅᔭᑎᒍᑦ ᑐᑦᑕᕕᐅᔪᒥ.

Read More

ᓱᓇᒥᒃ ᑕᒪᓐᓇ ᐱᓇᓱᐊᕐᓂᖅ ᐱᑦᔪᑎᓕᒃ?

ᑖᓐᓇ ᐅᑭᐅᖅ 2020 ᐊᔪᕐᓇᑐᕐᓯᐅᓇᕐᑑᓱᓂ ᐱᒻᒪᑦ ᐊᒥᓱᓄᑦ ᐃᓄᓐᓄᑦ.  ᑕᒪᑐᒪ ᑎᑭᓐᓂᖓ ᖃᓂᒻᒪᓯᐅᑉ (COVID-19)ᑉ ᓇᐅᓕᒫᓄᑦ ᐊᐅᓚᑦᔦᓯᒪᔪᖅ ᐱᐅᓯᕐᒥᒃ ᐃᓅᓯᕐᒧᑦ ᓇᓂᓕᒫᖅ ᓯᓚᕐᔪᐊᒥ ᐊᒻᒪᓗ ᑎᑭᐅᑎᒍᑎᒋᑦᓱᒍ ᐊᕐᓱᕉᓚᓇᕐᑐᒧᑦ ᐃᓄᓐᓄᑦ ᐊᒻᒪᓗ ᐃᓚᒌᓄᑦ ᐃᓅᖃᑎᒌᓐᓂᒥᒃ, ᒥᓂᑕᐅᑎᓐᓇᒍ ᑲᓇᑕ, ᑯᐯᒃ ᐊᒻᒪᓗ ᓄᓇᓕᖏᑦ ᓄᓇᕕᒻᒥ.  ᐊᔪᕐᓇᒪᑦ, ᑕᒪᓐᓇ ᐊᑑᑎᔭᐅᔪᖅ ᓱᓕ ᐃᓂᓪᓚᕈᑕᐅᕋᑕᓐᖏᓚᖅ, ᐊᒻᒪᓗ ᑕᒪᑐᒪ ᓱᕐᕃᓯᒪᓂᖓ ᓱᓕᐅᕗᖅ ᐃᒃᐱᓂᐊᕐᑕᐅᓂᖓ.  ᑖᓐᓇ ᓇᓂᓕᒫᕐᑐᖅ ᐊᒻᒪᓗ ᓄᐃᓚᕿᔭᖓ ᑎᑭᐅᑎᒍᑎᒋᑦᓱᒍ ᓄᓪᓚᖓᓇᓐᖏᑐᒧᑦ ᐊᑦᓱᐊᓗᒃ ᓄᓇᓕᓐᓄᑦ ᐊᑑᑎᓕᕇᕐᑐᓄᑦ ᐅᖁᒣᓐᓇᑐᓂᒃ ᐱᑦᔪᑕᐅᔪᓂᒃ ᐊᑑᑎᔭᒥᓂᒃ ᐊᒻᒪᓗ ᐱᒡᒐᕋᓱᐊᕐᓇᓕᕇᕐᑐᓄᑦ.  ᐊᓂᑦᑌᓕᓂᖅ, ᐊᑐᕐᑕᐅᒐᒥ ᑕᒐ ᐃᓕᑕᕐᓇᓕᕇᕐᓱᓂ ᓄᓪᓚᖓᑦᓯᐊᓇᓐᖏᑐᒥ ᐊᒥᓱᓄᑦ ᐃᓄᓐᓄᑦ ᐱᔭᐅᓯᒪᔪᓄᑦ ᑕᒪᑐᒧᖓ, ᓱᒐᓗᑦᑐᒥᒃ ᐊᕐᓱᕈᕐᓇᑑᒍᓐᓇᒪᑦ ᐃᓚᒌᓄᑦ ᐊᓂᕐᕋᒥᓂ ᐱᔭᕋᓕᓕᕇᕐᑐᓄᑦ ᐃᓚᒌᑎᒍᑦ ᐃᓱᐃᓗᑕᕐᒥᓄᑦ ᐋᓪᓛᑦ ᓱᓕ ᑕᒪᓐᓇ ᐱᓚᐅᕐᑎᓇᒍ ᐱᔪᓂᑦ ᖃᓂᒪᓐᓇᖅ.  ᐃᓄᐃᑦ ᐅᖃᕐᒪᑕ ᑐᓴᕈᑎᑎᒍᑦ ᐊᕐᓱᕈᕐᓇᑐᓂᒃ ᐊᑑᑎᔭᒥᓂᒃ ᕿᑐᕐᖓᒥᓄᑦ, ᐅᕕᒐᕐᑐᓄᑦ ᐊᒻᒪᓗ ᐁᑉᐸᕇᑎᒍᑦ.  ᐊᓂᑦᑌᓕᒋᐊᖃᕐᓂᖅ ᐊᒻᒪᓗ ᐃᓄᓐᓄᑦ ᓴᓂᒥᐅᑦᓯᒋᐊᖃᓐᖏᓂᖅ ᓱᕐᕃᒪᒍᓐᓇᒥᒻᒪᑦ ᐃᓱᒪᖓᓂᒃ ᐃᓅᑉ, ᓱᓕᓗ ᐊᓯᖏᑎᒍᑦ ᐱᔪᓂᑦᑕᐅᖅ ᓄᓪᓚᖓᓇᓐᖏᑐᓄᑦ ᑎᑭᐅᑦᔭᖏᓐᓄᑦ ᑕᒪᑐᒪ ᖃᓂᒪᓐᓇᐅᑉ, ᑕᒐ ᑲᑉᐱᐊᓇᕐᑐᒥᒃ, ᑲᕙᕐᓇᑐᒥᒃ, ᕿᓄᖓᓇᕐᑐᒥᒃ ᐊᒻᒪᓗ ᓭᒪᓇᓐᖏᑐᓂᒃ.

ᑌᒣᒃᑲᓗᐊᕐᑎᓗᒋᑦ ᑕᒪᒃᑯᐊ ᐱᒡᒐᕋᓱᐊᕐᓇᑐᑦ, ᐃᓄᐃᑦ ᓴᖅᕿᔮᕐᑎᓯᕗᑦ ᓲᖑᓂᕐᒥᒃ ᐊᒻᒪᓗ ᐊᓂᒍᐃᒍᓐᓇᖃᑦᑕᓂᕐᒥᒃ, ᐊᒻᒪᓗ ᐃᓚᖓᒍᑦ ᓴᖒᒪᕕᑦᓴᓂᒃ ᓄᑖᓂᒃ ᐃᓅᕕᖃᕆᐊᒥᒃ ᐋᖅᕿᓯᒪᐅᑎᑦᓴᓂᒃ ᓵᓐᖓᒋᐊᕐᓱᒍ ᑕᒪᓐᓇ ᐊᑑᑎᔭᐅᔪᖅ ᑕᒪᓐᓇᓗ ᓄᑖᒍᕗᖅ ᖃᐅᔨᒋᐅᕐᓇᓱᓂ ᓇᐅᓕᒫᓄᑦ.  ᓱᓕᓗ ᒪᓐᓇ, ᐱᑕᖃᕐᒥᑎᓪᓗᒍ ᐃᓄᓐᓄᑦ ᖃᐅᔨᑦᓱᑎᒃ ᓴᑑᒪᓇᕐᑐᒥᒃ ᐊᓯᐊᒍᑦ ᐊᓂᑦᑌᓕᓂᐅᑉ ᐃᓗᐊᓂ, ᑕᒐ ᒪᑯᐊ ᐊᓕᐊᓇᓐᖑᐊᒐᔭᕐᑐᓂᒃ ᐱᔭᑦᓴᓂᒃ ᐊᒻᒪᓘᓐᓃᑦ ᐱᕕᑦᓴᓂᒃ ᐱᕕᑦᓴᖃᕆᐊᒥᒃ ᑐᓂᒪᕕᒋᓗᒋᑦ ᓱᖃᑦᓯᐅᑎᑦᓴᓚᑳᒥᓄᑦ ᓇᒻᒥᓂᖅ ᐊᒻᒪᓘᓐᓃᑦ ᐃᓚᒌᑎᒍᑦ.

ᐊᑦᔨᒌᓐᖏᑐᑦ ᐋᖅᕿᓯᒪᐅᑎᑦᓭᑦ ᐱᑕᖃᕐᒪᑕ ᐃᓅᕕᖃᕆᐊᖃᕈᓂ ᐊᕐᓱᕈᕐᓇᑐᓂ ᐱᔪᖃᓕᕐᑎᓗᒍ ᐅᓪᓗᓂ.  ᑕᒪᒃᑯᐊ ᐃᒻᒧᐊᓂ, ᓴᓇᓐᖑᐊᓂᖅ ᐱᓇᓱᐊᕈᑎᒋᓗᒍ ᐱᑦᓴᖑᐃᓂᕐᒥᒃ ᐊᒻᒪᓗ ᓄᐃᑦᓯᒍᑎᒋᑦᓱᒍ ᑕᑯᑦᓴᐅᒪᑦ ᐱᒍᓐᓇᓂᕐᒥᒃ ᓄᓪᓚᖓᐅᑎᑦᓴᒥᒃ ᐊᑑᑎᔭᐅᔪᒧᑦ ᐃᓄᓐᓄᑦ ᐊᕐᓱᕈᐊᓪᓚᓇᕐᑐᑰᕐᑐᓄᑦ.  ᓴᓇᓐᖑᐊᓂᖅ ᐃᖅᙯᓇᕈᓐᓇᒪᑦ ᐃᒃᐱᓂᐊᕐᑕᑎᓐᓂᒃ ᐊᒻᒪᓗ ᖃᐅᔨᓯᒪᔭᑦᑎᓂᒃ ᐊᒻᒪᓗ ᐃᒃᐱᓂᕈᑎᒋᔪᓐᓇᓱᒍ ᐊᒃᑑᑎᒍᑎᒋᓗᒍ ᐊᓯᑦᑎᓄᑦ ᑕᒪᒃᑯᑎᒎᓇ ᖃᐅᔨᑎᑦᓯᐅᑎᒋᓗᒍ ᐃᒃᐱᓂᐊᕈᑎᑦᑎᓄᑦ ᐊᒻᒪᓗ ᖃᐅᔨᓯᒪᔭᑦᑎᓄᑦ.  ᐊᒻᒪᓗ ᐆᒻᒪᑎᑦᓯᒍᓐᓇᒥᑦᓱᓂ ᓴᓇᒍᓐᓇᓂᑦᑎᓂᒃ ᐊᒻᒪᓗ ᓄᓪᓚᓇᕐᑑᓗᓂ ᐃᓂᓪᓚᖓᓇᕐᑐᒥ ᐊᑑᑎᑎᑦᓯᓗᓂ ᑕᒪᒃᑯᓄᖓ ᑕᑯᔪᓄᑦ ᑕᑯᔭᑦᓴᒥᒃ.

ᑕᒪᓐᓇ ᐱᓇᓱᐊᕐᑕᐅᔪᖅ ᐃᓱᒪᖃᕈᑕᐅᒻᒪᑦ ᐊᒃᑐᐃᒍᒪᒧᑦ ᓇᐅᑐᐃᓐᓇᓄᑦ ᓄᓇᓕᓐᓄᑦ ᓄᓇᕕᒻᒥᐅᓄᑦ ᐊᒻᒪᓗ ᓯᓚᑖᓃᑦᑑᒐᓗᐊᓄᑦ ᓄᓇᕕᐅᑉ.  ᑕᒐ ᒪᓐᑐᔨᐊᓪ ᕿᑎᖓᓃᒻᒪᑦ ᖃᓂᒻᒪᓯᐅᑉ ᑯᐯᒃ ᓄᓇᖓᓂ ᐊᒻᒪᓗ ᑲᓇᑕᒥ, ᐊᒥᓱᑦ ᓄᓇᕕᒻᒥᐅᑦ ᐃᓱᒪᖃᕐᒥᒪᑕᑦᑕᐅᖅ ᓄᓇᖅᖃᑎᒥᓐᓂᒃ ᓄᓇᓯᒪᔪᓂᒃ ᐃᓪᓗᒐᓴᕐᔪᐊᓃᑦᑐᓂᒃ.  ᑕᒐ ᐱᓇᓱᐊᕐᑕᐅᔪᖅ ᐱᕙᓪᓕᐊᓂᖓ ᐃᖏᕐᕋᒪᑦ, ᐅᖃᖃᑎᒌᓐᓂᖅ ᑌᒪ ᐱᒋᐊᕐᓂᓕᒐᔭᕈᓇᖅ ᑖᒃᑯᐊ ᐊᑯᕐᖓᓂ ᐃᓄᐃᑦ ᓄᓇᕕᒻᒦᑐᑦ ᐊᒻᒪᓗ ᐃᓄᐃᑦ ᒪᓐᑐᔨᐊᓚᒦᑦᑐᑦ.  ᓇᓪᓕᐊᒍᑦ ᐱᑐᑦᓯᒪᐅᑎᐅᒍᓐᓇᑐᒧᑦ ᑐᓐᖓᕕᖃᕐᓗᓂ ᓴᓇᓐᖑᐊᑕᐅᔪᓂᒃ ᐱᖃᑎᒌᒍᑎᖃᕐᓂᒥᒃ ᐊᒻᒪᓗ ᖃᐅᔨᐅᑎᓗᑎᒃ ᐊᓯᒥᓂᑦ ᑕᒐ ᓄᐃᑦᓯᒍᓐᓇᕋᔭᕐᒥᒪᑦ ᑕᒃᕙᖓᑦ ᐱᒋᐊᕐᓂᓕᐅᑎᐅᓕᕐᓗᓂ.

ᐊᑕᐅᑦᓯᑰᕐᑎᓯᕕᒻᒥ ᐱᓇᓱᐊᕐᑐᑦ ᐅᑯᐊᑕᒐ

  • ᐅᓕᕕᐊ ᓕᐊ ᑑᒪᓯ, ᐱᓇᓱᐊᕋᑦᓴᓄᑦ ᐱᓇᓱᐊᕐᑎ, ᐊᐅᒫᒡᒋᕕᒃ ᓄᓇᕕᒻᒥ ᓴᓇᓐᖑᐊᓂᕐᒧᑦ ᐊᓪᓚᕕᖓᑕ ᐱᓕᕆᕕᐊᓂ, ᐊᕙᑕᒃᑯᓂ
  • ᔭᓂᒃ ᔮᓐᓴᓐ-ᓚᕗᓘ, ᐊᑕᐅᑦᓯᑰᕐᑎᓯᔨᖓ, ᐊᑕᐅᑦᓯᑰᑉ ᐱᓇᓱᐊᕐᓂᖓᑕ
  • ᓘᓯ ᓇᑑ, ᖃᐅᔨᓴᕐᓂᒥᒃ ᑲᒪᔨᖓᑦ, ᐊᑕᐅᑦᓯᑰᒥ ᐱᓇᓱᐊᕐᓂᓂ
  • ᐋᓐᑎᕇ ᐋᓐ ᕕᐊᓐ, ᑐᑭᒧᐊᕐᑎᓯᔨ, ᐊᐅᒫᒡᒋᕕᒃ ᓄᓇᕕᒻᒥ ᓴᓇᓐᖑᐊᓂᕐᒧᑦ ᐊᓪᓚᕕᖓᑕ ᐱᓕᕆᕕᐊᓂ, ᐊᕙᑕᒃᑯᓂ
  • ᓯᐊᔭ ᕗᔦᓱ, ᐃᑲᔪᕐᑎ-ᑲᒪᔨᒧᑦ ᖃᐅᔨᓴᕐᓂᓂ, ᐊᑕᐅᑦᓯᑰᑉ ᐱᓇᓱᐊᕐᑕᐅᓂᖓᓄᑦ, ᐊᒻᒪᓗ ᓯᕗᓕᕐᑎᐅᓚᕐᒥ ᐱᓇᓱᐊᕐᑐᓄᑦ, ᐱᑐᑦᓯᒪᔪᑦ ᐱᓇᓱᐊᕐᑎᖏᑦ
  • ᓗᐃ ᑳᖕᔪᖕ, ᑲᒪᔨ ᐱᐅᓕᓂᐊᕐᕕᒥᒃ

Credit: Ulivia Uviluk

ᑲᑎᓯᒋᑦᓯ ᓴᓇᓐᖑᐊᑎᓂᒃ

ᖃᓄᐃᓕᓗᖓ ᐃᓚᐅᒍᓐᓇᑐᖓ ᑕᒪᑐᒪᓂ ᐱᓇᓱᐊᕐᓂᐅᔪᒥ?

ᐅᓇ ᐊᓪᓚᕕᐅᖃᑦᑕᑐᖅ ᓇᓛᓂ ᑕᒃᕙᓂ ᐅᓂᒃᑳᓯᐅᒐᑦᓴᓂ ᓄᐃᑕᑎᑦᓯᕕᖓ ᐃᓂᐅᕗᖅ ᑌᓐᓇ ᐃᓇᑦᓯᕕᕗᑦ ᐃᓕᑦᓯᓂᒃ ᖃᓄᐃᓕᒍᓐᓇᑐᑎᑦ ᐃᓕᖓᔪᒥᒃ ᒪᑐᒧᖓ ᓴᓇᓐᖑᐊᓂᑎᒍᑦ ᒪᑭᑕᖃᑎᒌᓐᓂᖅ ᐱᓇᓱᐊᕐᓂᖓ.  ᑖᓐᓇ ᐱᓇᓱᐊᕐᓂᖅ ᐊᑐᕈᒪᒻᒪᑦ ᓴᓇᓐᖑᐊᓂᕐᒥᒃ ᐊᑐᕐᓗᓂ ᓄᐃᑦᓯᓂᕐᒥᒃ ᐃᓅᕕᖃᕐᓂᒥᒃ ᐊᑑᑎᔭᒧᑦ ᑕᒃᕙᓂ COVID-19 ᖃᓂᒻᒪᓯᕐᒥ ᐊᒻᒪᓗ ᐊᓂᐊᑦᓯᒍᑎᒋᓗᒍ ᐊᕐᓱᕉᓴᕐᓂᒥᒃ ᓄᓪᓚᖓᓇᓐᖏᑑᑦᓱᓂ.  ᐃᓱᒪᖃᕐᐳᒍᑦ ᑖᓐᓇ ᑐᓐᖓᓇᕐᓗᓂ ᐊᒻᒪᓗ ᐃᖅᖃᑐᐃᒍᓱᓐᓂᑕᖃᕈᓐᓀᓗᓂ ᐃᓂ.  ᐃᓱᒪᓐᓂᒃ ᑐᓴᕐᑕᐅᑎᑦᓯᕕᒋᓗᒍ, ᐃᑲᔪᕈᑎᒋᒐᔭᕐᑌᑦ ᑖᑦᓱᒧᖓ ᐱᕙᓪᓕᐊᓂᕐᒧᑦ ᑫᒥᑕᐅᓐᓇᓗᓂ, ᐃᑲᔪᕐᓯᔭᐅᓐᓇᓗᓂ ᐊᒻᒪᓗ ᖃᓄᐃᓕᐅᖃᑎᒌᒃᕕᒋᓗᒍ ᐅᖃᖃᑎᒌᓐᓂᑯᑦ ᑕᒪᑐᒪᓂ ᐊᑑᑎᔭᕆᔭᒥ ᑕᒐᑕᒐ ᖃᓂᒻᒪᓯᕐᒧᑦ.

ᓄᐃᑕᑎᑦ ᐃᓕᖓᒍᓐᓇᒥᔪᑦ ᓴᓇᓐᖑᐊᓯᒪᔭᖏᓐᓄᑦ ᑖᒃᑯᐊ ᐱᓇᓱᐊᕐᑕᐅᔪᒥ ᐃᓚᐅᔪᑦ ᓴᓇᓐᖑᐊᑏᑦ, ᐊᒻᒪᓘᓐᓃᑦ ᐊᓯᐊᓄᑦ ᓇᒻᒥᓂᖅ ᐊᒻᒪᓘᓐᓃᑦ ᐃᓘᓐᓈᒎᕐᑐᒥᒃ ᖃᐅᔨᓯᒪᓕᕐᑕᓯᓐᓄᑦ ᐊᑦᑐᐊᔪᓄᑦ ᑕᒪᑐᒧᖓ covid-19 ᖃᓂᒻᒪᓯᐅᑉ ᐊᑑᑎᓂᖓᑕ ᓄᓇᕕᒻᒥ.  ᐃᓱᒪᒋᔭᑎᑦ, ᐊᐱᕐᓲᑎᑦᓴᑎᑦ ᐊᒻᒪᓗ ᐅᖃᐅᓯᒃᓴᑎᑦ ᐱᕙᓪᓕᓇᕐᑑᓂᐊᕐᑐᑦ ᑕᒪᑐᒧᖓ ᐱᓇᓱᐊᕐᑕᐅᔪᒧᑦ ᐊᒻᒪᓗ ᐃᑲᔪᕐᓯᓗᑎᒃ ᐅᖃᖃᑎᒌᑦᑐᓄᑦ.

ᓄᐃᑎᑕᐅᓂᖏᑦ ᑕᒃᕙᓂ ᑕᑯᒋᐊᕐᕕᓴᒥ ᐊᑐᕈᓐᓇᐳᑦ ᐃᓄᒃᑎᑑᕐᓗᑎᒃ, ᖃᓪᓗᓈᕐᑎᑑᕐᓗᑎᒃ ᐊᒻᒪᓘᓐᓃᑦ ᐅᒥᓕᑦᑎᑑᕐᓗᑎᒃ ᓇᓪᓕᐊᒍᑦ ᐃᓱᐊᕐᓂᖓᒍᑦ ᐱᓂᐊᕐᒪᑦ ᑖᒃᑯᓄᖓ ᐃᓘᓐᓀᓄᑦ ᐃᓚᐅᖃᑕᐅᔪᑦᓴᐅᔮᕐᑐᓄᑦ ᑕᒃᕙᓂ ᖃᓄᐃᓕᐅᖃᑎᒌᑦᑐᓂ.  ᑖᒃᑯᐊ ᑲᒪᔨᖏᑦ ᑖᑦᓱᒪᐅᑉ ᑕᑯᑦᓴᐅᑎᑦᓯᕕᐅᔫᑉ ᖁᓚᕐᓇᖏᑦᑑᑎᑦᓯᓂᐊᕐᑐᑦ ᐃᒫᒃ ᓄᐃᑎᑕᐅᔪᑦ ᐃᓗᓕᖏᑦ ᖃᓪᓗᓈᕐᑎᑑᕐᑎᑕᐅᓗᑎᒃ, ᑌᒫᒃ ᐱᑐᐊᕐᐸᑦ ᐊᒥᓲᓂᕐᓴᓄᑦ ᐊᒻᒪᓂᕐᓴᐅᒐᔭᕐᒪᑦ ᑖᒃᑯᓄᖓ ᐅᓂᒃᑳᓯᐅᒐᑦᓴᒧᑦ ᑕᑯᒋᐊᖃᑦᑕᓂᐊᕐᑐᓄᑦ.  ᑖᒃᑯᐊᓗ ᖁᓚᕐᓇᖏᑦᑐᑯᑦ ᐃᒫᒃ ᐃᓗᓕᖏᑦ ᖃᓄᐃᓕᐅᖃᑎᒌᓐᓃᑦ ᐊᒻᒪᓗ ᓄᐃᑎᑕᐅᔪᑦ ᓲᓱᑦᓴᓯᐊᖁᑦᓱᒋᑦ ᑖᑦᓱᒪᐅᑉ ᐅᓂᒃᑳᓯᐅᒐᐅᑉ ᖃᕆᑕᐅᔭᑎᒍᑦ ᓈᒻᒪᓈᕐᓯᒪᑦᓯᐊᖁᑦᓱᒍ ᖃᓄᑐᐃᓐᓈᖏᑦᑐᒥᒃ.

ᐅᓇ ᐱᓇᓱᐊᕐᓂᖅ ᓱᓕ ᐃᓱᒪᖃᕈᑎᒋᒻᒥᓗᒍ ᓄᐃᑦᓯᒍᓐᓇᕕᐅᓗᓂ ᐱᕙᓪᓕᓇᕐᑐᒥᒃ ᓂᓪᓕᐊᓂᕐᒥᒃ.  ᐊᒻᒪᓗ ᓱᓕ ᐆᒻᒪᒥᑦ ᐃᓇᑦᓯᐅᑎᕗᑦ ᐃᓕᑦᓯᓂᒃ ᐃᓚᐅᕕᖃᖁᓪᓗᓯ ᑕᒃᕙᓂ ᓄᐃᑕᑎᑦᓯᕕᒻᒥ ᓇᒻᒥᓂᕐᓂᒃ ᓴᓇᑦᔫᒍᑎᓐᓂᒃ ᐱᑦᓴᖑᐃᒋᐊᒥᒃ ᐊᑦᑐᐊᔪᒥᒃ ᑕᒪᑐᒧᖓ covid-19ᒧᑦ ᖃᐅᔨᔭᕐᓂᒃ ᐃᓅᕕᒋᑦᓱᒍ.  ᑕᒐ ᑌᒣᒍᒪᔪᖃᕈᓂ, ᐊᓪᓚᕕᐅᒍᓐᓇᑐᒍᑦ ᐅᕗᖓ Janique.JohnsonLafleur.dlm@ssss.gouv.qc.ca or olivialyat@avataq.qc.ca ᒧᑦ.  ᖃᐅᔨᔭᐅᑎᑦᓯᒍᕕᑦ ᓴᓇᓐᖑᐊᑕᕐᓂᒃ ᑕᒃᕙᓂ ᑕᑯᑦᓴᐅᑎᑦᓯᕕᒻᒥ ᐱᐅᔫᒐᔭᕐᒥᒪᑦ ᐊᓯᓐᓅᕕᑦ ᑌᑯᖓ ᐅᓂᒃᑳᓯᐅᒐᑦᓴᒥ ᑕᑯᒋᐊᕐᑐᓄᑦ ᐊᒻᒪᓗ ᐃᒻᒪᖄ ᐱᕙᓪᓕᖁᑕᐅᒍᓐᓇᕋᔭᕐᒥᒪᑦ ᑕᑯᔪᓄᑦ ᓴᖒᒪᐅᑎᖃᕐᓗᑎᒃ ᓄᐃᑎᕆᓂᒃᑯᑦ ᐊᒻᒪᓗ ᐱᓪᓚᕆᓐᖑᐊᒥᒃ ᐱᒍᓐᓇᓂᖓᒍᑦ ᓴᓇᓐᖑᐊᓯᒪᔪᑦ ᑕᒪᒃᑯᓇᓂ ᐊᕐᓱᕈᕐᓇᑐᑦ ᐱᓕᕐᑎᓗᒋᑦ ᐊᑑᑎᔪᑦ.

ᓱᖁᑕᐅᓐᖏᑐᑦ ᖃᕆᑕᐅᔭᕐᑎᒎᕐᑎᒋᐊᖏᑦ

ᑖᓐᓇ ᑕᑯᑦᓴᐅᑎᑦᓯᕕᒃ ᒪᑐᐃᖓᔪᖅ ᐃᓘᓐᓀᓄᑦ ᓇᐅᓕᒫᓄᑦ.  ᐃᓘᓐᓇᖏᑦ ᖃᓄᐃᓕᐅᖃᑎᒌᒍᑕᐅᔪᑦ ᑕᒃᕙᓂ ᐃᓄᒃᑎᑑᕈᓐᓇᑐᑦ, ᖃᓪᓗᓈᕐᑎᑐᑦ ᐊᒻᒪᓘᓐᓃᑦ ᐅᒥᓕᑦᑎᑐᑦ.

ᑕᒪᓐᓇ ᐅᖃᖃᑎᒌᓐᓂᖅ ᑕᒃᕙᓂ ᑕᑯᔭᑦᓴᓄᑦ ᑕᑯᑦᓴᐅᑎᑦᓯᕕᖓᓂ ᐱᑦᔪᑎᓕᒃ ᒪᑐᒥᖓ ᐃᓪᓕᕆᓗᒋᑦ ᒪᑯᐊ ᑕᒐ ᓲᓱᒋᐅᑎᓂᖅ ᐊᒻᒪᓗ ᐊᓯᑎᑦᓂᒃ ᐃᓱᒪᖃᑦᓯᐊᕈᑎᒋᓗᒍ, ᕿᓄᐃᑦᑑᓗᓂ ᐊᒻᒪᓗ ᐃᓄᖅᕿᑑᓗᓂ.  ᑕᒐ ᓄᐃᑕᑎᑦᓯᒍᕕᑦ ᑕᒃᕙᓂ ᑕᑯᔭᑦᓴᓕᐅᕐᕕᒥ, ᐱᖁᒐᓗᐊᕐᐸᑎᒋᑦ ᓲᓱᑦᓴᓂᕐᒥᒃ ᐊᓯᒧᑦ ᐊᑯᕐᖓᓂ ᑌᒃᑯᓄᖓ ᐱᖃᑕᐅᒻᒥᔪᓄᑦ ᓂᓪᓕᖃᑦᑕᒥᓗᑎᒃ, ᓱᓕᓗ ᒪᓐᓇ ᒪᑯᓄᖓᓗ ᑌᒃᑯᓄᖓ ᓴᓇᓐᖑᐊᑎᓄᑦ ᐱᖃᑕᐅᔪᓄᑦ ᑕᒃᕙᓂ ᐱᓇᓱᐊᕐᓂᓄᑦ ᐊᒻᒪᓗ ᑐᑭᒧᐊᑦᑎᓯᔪᓄᑦ ᑖᑦᓱᒪᓂ ᖃᕆᑕᐅᔭᒃᑰᑐᒧᑦ ᓄᐃᑕᑎᑦᓯᕕᐅᔪᒥ.

ᑕᒐ ᓂᓪᓕᐊᓂᕐᐱᑦ ᓂᐱᓕᔭᕐᓂᖓ ᐊᓪᓚᑕᑎᓐᓄᑦ ᑐᓴᕐᑕᐅᑎᑦᓱᒋᑦ ᑕᑯᔭᑦᓴᖃᕐᕕᒧᑦ ᐃᓄᖅᕿᑑᒋᐊᓖᑦ ᐊᒻᒪᓗ ᓄᐃᑕᑎᑦᓯᓗᑎᒃ ᓲᓱᑦᓴᓯᐊᕐᓂᒥᒃ ᐊᓯᒧᑦ, ᐱᖃᓯᐅᑎᒻᒥᓗᒍ ᐃᓱᒪᒥᓂᒃ ᐅᖃᕐᒥᔪᓄᑦ ᐊᑦᔨᒋᔭᐅᑦᔭᖏᑉᐸᑕ ᐃᓱᒻᒪᓯᑎᑦ.  ᑕᒐ ᐊᑐᕐᑕᐅᐸᑦ ᐊᖏᔪᕐᓚᓕᔪᓂᒃ ᐊᓪᓚᑐᒧᑦ (ᖁᖂᒪᐅᓯᕆᑦᓱᒍ) ᑕᒪᓐᓇ ᐊᑐᕐᑕᐅᔪᑦᓴᐅᖏᑦᑐᖅ.  ᐊᓪᓚᑕᑎᑦ ᐃᓕᓐᓄᐊᖓᓗᑎᒃ, ᓂᐅᕐᕈᓯᕋᓱᐊᕐᓂᑕᖃᕈᓐᓀᓗᓂ ᓇᒻᒥᓂᕐᒧᐊᖓᔪᒥᒃ ᐃᓗᓯᖃᕆᐊᖃᑦᔭᖏᒻᒪᑦ.  ᐃᖅᙯᑎᒋᐊᕐᒥᔭᓯᓗ ᐃᒃᐱᒍᓱᑦᓯᐊᖁᑦᓱᓯ ᖃᓄᐃᓕᐅᕈᑎᖃᖁᓇᓯ ᐃᕐᐸᑐᑦᓴᐅᖏᑦᑐᓂᒃ ᖃᐅᔨᔭᐅᑎᑦᓯᕕᐅᒋᐊᖃᑦᔭᖏᒻᒪᑦ ᑖᓐᓇ ᖃᕆᑕᐅᔭᑎᒍᑦ ᐅᓂᒃᑳᓯᐅᒐᑦᓴᓄᑦ.

ᑕᒐ ᐊᐱᕐᓲᑎᓯ ᐊᒻᒪᓘᓐᓃᑦ ᐅᖃᐅᓯᒃᓴᖃᕈᑦᓯ ᑐᓭᓐᓇᑕᐅᒍᓐᓇᑐᑦ ᒪᑯᓂᖓ ᐃᓗᓕᖃᑐᐊᕐᐸᑕ ᓇᓪᓕᖏᓐᓂ ᑕᑲᒃᑯᐊ ᐊᓪᓚᑕᐅᔪᑦ:

  • ᐆᒥᓲᑏᑦ ᐊᒻᒪᓘᓐᓃᑦ ᖃᕿᐊᕐᓯᓂᕐᓂᒃ ᐅᖃᐅᓯᖃᕐᓂᖅ ᑐᓐᖓᕕᓕᓐᓂᒃ ᓇᓂᒥᐅᑕᐅᓂᕐᓂᒃ ᐱᔪᓂᒃ, ᐊᕐᓇᐅᓂᖓᓄᑦ ᐊᖑᑕᐅᓂᖓᓄᑦ, ᐅᒃᐱᓂᖓᓄᑦ, ᖃᓄᐃᑦᑐᒥᓪᓗ ᐁᑉᐸᖃᕈᓯᖓᓄᑦ, ᐅᑭᐅᖓᓄᑦ ᐊᒻᒪᓘᓐᓃᑦ ᑕᐅᑦᑐᖓᓄᑦ ᑎᒥᖓᑕ ᐊᒻᒪᓘᓐᓃᑦ ᐃᓱᒪᖃᑦᓯᐊᖏᑦᑐᒥᒃ ᖃᓄᐃᓕᐅᕆᓃᑦ;
  • ᓇᒻᒥᓂᖅ ᐱᓐᓂᐊᑕᐅᓃᑦ, ᓴᐱᕐᓴᐅᑏᑦ, ᐅᖃᐅᓐᓂᓗᒃᕕᐅᒍᑏᑦ ᐊᒻᒪᓘᓐᓃᑦ ᐅᖃᐅᓯᕐᓘᑎᓂᒃ ᐱᑕᓕᓐᓂᒃ;
  • ᐱᐅᑦᓯᐊᖏᑦᑐᑦ, ᒪᖁᔪᓐᓇᑐᑦ ᐊᒻᒪᓘᓐᓃᑦ ᐃᑦᓯᒎᕐᓂᓗᓐᓂᒧᑦ ᓇᓗᓇᕋᑎᒃ ᐅᖃᕐᑕᐅᔪᑦ.